و اخيرا اشتريت كـاميرا

بعد تفكير طويل وبحث لفترة طويلة عالنت ومقارنات بين الكاميرات
وبعد ماقرأت تقارير عن الكاميرا و شفت صورها ونتايجها ورأي اصحابها اللي اقتنوها
استقر المطــاف على
Canon G9
طبعا الحكــاية طويلة بس لازم احكيلكم هيه
انا من زمان وانا نفسي اشتري كاميرا خاصه فيا ... بدل ما كل يوم والتاني وانا مستلفه كاميرا اختي او متصورة مع فلانه او علانه في كاميرتها اختي
او مصورة بالجوال
وطبعا كلكم عارفين صور الجوال !!
قلت بس يابت ما بدهاش لازم تشتريلك كاميرا
وبدأت رحلة البحث عن كاميرا ... بدأت اعمل سيرتش في الجوجل عن كل ماله علاقه بالكاميرات الديجتال
بدأت اقرأ اراء الناس في مختلف الشركات واشوف تجاربهم ونتايج صورهم
وفعلا استقر الرأي على الكانون جي 9
طبعا بعد مقارنات و تفضيلات حسب الميزانية والمواصفات

لأنو في كاميرات مواصفاتها اقوى وتساعدني على بداية الأحتراف زي الكاميرات النصف احترافية

طبعا العين كانت على Canon 450D

بس سعرها كان اكبر من ميزانيتي في الفترة اللي اشتريت فيها الجي 9

عشان كده اخدت الأفضل في حدود امكانياتي وبصراحه جدا مرتاحه في استخدامها وللنتايج اللي بتطلع معايا

وعملتلي حساب عالفليكر وحبيت تشاركوني ب اراءكم وتعليقاتكم
صفحتي عالفليكر
http://www.flickr.com/photos/taimaa/

طال غيابي

طــال غيابي عن بيتي الثاني

طال لظروف خارجة عن ارادتي

مرورا بدراستي وامتحاناتي

واخيرا بوفاة والدي المفاجئ في حادث

الحمدلله حمدا كثيرا طيبا مباركا فيه ..حمدا يليق بجلال وجهك وعظيم سلطانك

راح احاول انتظم اكثر في تدويني

وراح ارجع اكتب من تاني وندردش سوا

سلام

امتحانااااااااات

الاسبوع ده اللي يبدأ بكره راح تبدأ معاه امتحاناتي في الجامعه , طبعا مااوصفلكم كمية الضغط والقلق اللي انا فيهم ,ما خلصت مذاكرة ولا مادة وامتحاناتي كلها راح تكون من العصر للمغرب ( بحكم اني انتساب ) يعني الى ماارجع البيت راح يكون يومي كلو ضاع وماعندي وقت عشان اذاكر للمادة الثانية الا من بعد الفجر!! لأني مو طبعي اعرف اواصل او اذاكر في الليل ... سبحان الله مااقدر وحتى لو ضغطت على نفسي مااستفيد من مذاكرتي ولا شئ لأني اكون متنحه ومرهقة وتعبانه .

بس طالبتكم تدعولي انو ربنا يوفقني ... و كمان انو ربنا يناولني اللي في بالي و يرزقني سعادة الدارين ويسهل اموري ويختارلي اللي فيه الخير ...

لما اطلب من أي شخص انو يدعيلي دي الدعوة ... مااخلص كلامي الا يسألني ... مين اللي في بالك ؟؟ :) والله مافي شخص محدد بس انا بقول ادعولي ربنا يناولني اللي في بالي عشان انا عندي دعوات كثير وامنيات كثيرة بدعيها وبطلبها من ربنا وبلخصها انو تدعولي باللي في بالي ;)

هذي اول سنه ليا في الجامعه وأول ترم من بعد انقطاع عن الدراسه , صحيح درست كمبيوتر و انجليزي ونوعا ما اعتبر نفسي مستفيدة من وقتي بس سبحان الله المذاكرة غير لما تكون لشهادة رسمية , خصوصا اني بدرس كذا مادة مو مادة واحدة زي مااتعودت انو يا كمبيوتر يا انجليزي , وتركيزي لازم اخصصه لكل مادة .

الله يعدي الأسبوع ده على خير ... عليــا وعلى كل الطــلاب يااااااااارب ...

كل سنه وانتو بخير بمناسبة السنه الجديدة ... و دي اول مقالة افتتح بيها البلوج تبعي في السنه الجديدة :) .